6690《「小輪」傾側，「纜車」排長龍》

當旅客大軍壓境，「香港 3 寶」面對的逼切問題：大寶「電車」是「擠」。
二寶「山頂纜車」是「排隊」，仲要係超長嗰隻。又可能為「龍年」應景，龍頭見首不見尾，長上加長。
中環花園道的纜車站前，恒久以來排長龍，已屬常態。
厲害在排到上山。原來有部份聰明遊客，為免總站擠逼，往第二站「梅道」（May Road）登車。
放是該站前，又出現長龍。有朋友住在附近的麥當奴道，早上出門：咦？何解人龍排到上來？
並出現糾纏現象。排排吓，也不知是從「梅道」站，排落「花園道」總站？或調轉頭，從總站排上來？好亂。
建議一：請盡快找交通警，維持人龍秩序。港島半山路窄多彎，萬一排隊的遊客出事，大家都唔想。
建議二：乾脆將人龍引上山，下一站「白加道」（Parker Road）。繼續下去，終於會排到上山頂，好嘢，大家唔使煩。
去到第三寶「天星小輪」，問題是「傾側」。
原來有朋友，每日乘小輪渡海返工，必定遇到大批遊客上船。好在船身夠大，不用擠，又不用排隊，豈不甚好？
不料開船後，一出維港，只怪两岸景色太過美麗，衆遊客蜂湧往船頭，又是爭位拍照/拍片/觀景/吹風等等。
導致船身嚴重傾側，朋友坐在另一邊，以一己體重，瘦骨纖纖，深感獨力難支。
亦有两項建議。一是小輪多放救生衣，救生圈等，以保乘客落水安全。二是海事處，請多派員隨船觀察，及早做安全措施。
否則，萬一發生意外，「香港 3 寶」變「香港 3 害」，大吉利是，勿讓好事變禍災。😊