6750《巴黎最新人氣景点》

巴黎像香港一樣，疫症過後，為吸引遊客，亦努力經營新景点。
加上為迎接今年七月奧運及國慶，全法國的名勝古跡，統統洗白白；巴黎歌劇院及聖母院，正在工事進行中。
其他的鐵塔/ 凱旋門/ 香榭麗舍大道等，人山人海。至於羅浮宮，遠遠見到旅行團泛濫成災，衆領隊旗仔亂揈，經已腳軟。
点算？巴黎巿政府，一於力推「拿破崙墓」（ The Invalides），成為最新的人氣景点。
「新」到甚麼程度？位於左岸的「鐸西博物館」（Musee d’Orsay）後邊，如果你乘的士，九成九會去錯。
司機多數會送你去到「先賢祠」（Pantheon），同樣是「墓」，同樣是「紀念死人」，同樣死的是「名人」；但人比人，比死人，即使死咗，都係有嚴重的歧視問題，即使你告上「平機會」都冇用。
有份葬在祠內的，粒粒巨星：「聖女」貞德。伏爾泰。雨果。大仲馬。盧梭。左拉。居禮夫人等等。
可惜，全部加起來，論明星效應，居然不及一個「拿破崙」。
難得，售票員心平氣和：「不要緊，很多遊客都來錯。但既然來到，裏面都好多嘢睇；下午三点後，還開放天台的圓頂觀景台，不妨上去一看。」
祠內幽深陰涼，仿如古墓，正好消暑。不久三点後，須另付 3 個半歐元，再爬上長長的天梯，終於上到頂。
部份「榮譽巿民」因膝關節問題，被逼半途放棄。但要是真的來到，放眼四望，全巴黎的景点，盡收眼底，深感不枉此行。
包括遠遠望到的「拿破崙墓」：白身金頂，在午後的陽光下，晶光閃閃，果真有帝皇氣派。
此墓雖以「拿破崙」為名，其實同一處，共葬有五位法國皇帝，「拿哥」只是其中之一。可是如前言，「明星效應」無理可喻，世人只認得他一個。😊