康子【 短歌行 】：087 《 夢見「小黑炭」堆滿，大吉 》

有讀者說，掛念家貓女「小黑炭」，囑筆者多寫牠的故事。
剛巧有一個：最近聰明朋友得夢，小黑炭上貓廁所後，堆到盤滿砵滿，滿到瀉咁滯。
朋友話佢两句，牠若無其事咁，滋油淡定，自己舔手舔腳。
奇，因為平時，當佢有些少「落点不準確」，會拚命抓地板，以為可挖沙，試圖掩飾；望見主人時，亦有愧疚之意，通常會緊急搞醒「黑執事」（小弟）幫佢「執」。
但今次冇，反應十分平靜。且由得牠，点算？朋友惟有戴上手套，預備「大執」，夢醒。
由於朋友一向是《靈氣逼人》的忠實讀者，對「夢兆」頗知一二，瞭解凡夢見「血」/「便便」等，大吉。
應驗極速，翌日，即有朋友上門還錢，數目不菲，果然是「盤滿砵滿」，中。
其實此夢之用神，不在「小黑炭」，而在那「堆」；難怪夢中的牠，意態悠閒，真係唔關佢事。
看傳統夢兆，凡夢見「血」，「糞便」，「棺材」等，俱与財運有關。不過孰多孰少？仍在研究中，詳情要請教「發夢局局長」。
有關夢境，以上。至於現實中的小黑炭，正在為減肥努力；其實主人對肥/瘦沒所謂，無奈，最近牠看醫生，有牙周病，要動小手術。
可是開刀之前，要先全身麻醉，由於牠吃飽睡足，體態豐盈，打不進麻醉針，醫生話「一定要減」。
故，人貓刻苦努力中（冇陰功）🥲。